Námskrá

Námskrá fyrir almenn ökuréttindi, flokkur B, fólksbifreið/sendibifreið tók gildi 1. febrúar 2010. Hún er unnin í nánu samstarfi Ökukennarafélags Íslands og Umferðarstofu. Um leið féll úr gildi eldri námskrá sem staðfest var af ráðherra 29. desember 1999.

Fjöldi lágmarkstíma er aukinn um leið og gerð er breyting á núverandi skipulagi ökunámsins.

• Bóklegar kennslustundir eru 25 og skiptast í; 12 í Ö1, 10 í Ö2 og 3 í Ö3.
• Kennslustundir í bifreið eru að lágmarki 17 og þar af eru tvær í ökugerði.
  

Með námskránni eru sett fram námsmarkmið er lúta að sérhæfðri kennslu í ökugerði. Kennslan felur í sér samþætta bóklega og verklega ökukennslu með því markmiði að auka skilning ökunemans á áhættuþáttum umferðarinnar, s.s. breytilegu veggripi, takmarkaðri mannlegri getu o.fl. Kennslan fer fram í viðurkenndum ökugerðum og er lögð áhersla á að ökuneminn sé virkur í öllu kennsluferlinu. Meginviðfangsefni kennslunnar er eigin reynsla ökunemans af því sem gert er og ályktanir hans í kjölfarið.

---