ÖKUNÁM.

Þegar þú hefur ákveðið að hefja ökunám byrjar þú á því að ræða við foreldra þína og tekur ákvörðun í samráði við þá. Síðan hefur þú samband við mig. Oft getur verið erfitt að taka upp símann í fyrsta sinn en þegar ísinn er brotinn er framhaldið ekkert vandamál. Eftir að þú hefur farið í fyrsta tímann, ákveðum við næsta tíma, og þá ætti að vera ljóst hvernig best er að haga náminu til að það samræmist sem best þínum þörfum. Svo nokkur dæmi séu tekin, þá eru sumir á morgnanna og vilja enda tímann í vinnunni, aðrir fá að skreppa úr vinnunni t.d. í matar eða kaffitíma, aðrir koma eftir vinnu eða skóla.

HVAÐ ÞARF ÉG MARGA ÖKUTÍMA?

Þetta er spurning sem flest allir ökukennarar fá hjá nemendum sínum. Því er fljót svarað, fólk er misjafnlega lengi að ná tökum á akstrinum og reynslan hefur sýnt að það er ekki hægt að svara því svo nákvæmt sé hvað hver og einn einstaklingur þarf. Allt hangir þetta saman, hvernig þér gengur, jafnt í bóklega náminu og í bílnum. Æfingaaksturinn hjálpar oftast en þá er æskilegt að æfa sig reglulega t.d. 3x í viku og fara mismunandi leiðir.

BÍLPRÓF; SKRIFLEGT PRÓF, VERKLEGT PRÓF.

Þú mátt taka bóklega prófið 2 mánuðum áður en þú verður 17 ára. Akstursprófið máttu taka viku fyrir afmælisdaginn. Þó verður þú að muna að ekki er hægt að skrá þig í próf fyrr en þú ert búin(n) að fara með umsóknina þína til sýslumanns og hefur greitt gjald fyrir skírteinið. Allir á höfuðborgarsvæðinu taka prófin hjá Frumherja í Reykjavík eða Hafnarfirði.

ÆFINGAAKSTUR MEÐ LEIÐBEINENDA.

Nú mega allir sem vilja byrja ökunámið 16 ára og fara síðan í æfingaakstur með foreldri eða öðrum fullorðnum á námstímanum. Fyrst þarf viðkomandi að fara í tíma til ökukennara og þegar hann hefur metið nemandann hæfan til að geta ekið einn og hjálparlaust gefur hann út vottorð sem síðan er fyllt út af verðandi leiðbeinanda. Umsóknina þarf að fara með til lögreglustjóra eða sýslumanns.